ಬೆಂಗಳೂರು: ಕರ್ನಾಟಕ ರಾಜ್ಯ ಹಾಕಿ ಕ್ರೀಡಾಂಗಣಕ್ಕೆ ಫೀಲ್ಡ್ ಮಾರ್ಷಲ್ ಕೆ.ಎಂ. ಕಾರಿಯಪ್ಪ ಎಂದು ಮರು ನಾಮಕರಣ ಮಾಡಿ ಗುರುವಾರ ಉದ್ಘಾಟಿಸಲಾಯಿತು. ಸುಮಾರು 3.75 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ವಿುಸಲಾಗಿರುವ ನೂತನ ಸಿಂಥೆಟಿಕ್ ಟರ್ಫ್ ಹಾಗೂ ಫ್ಲಡ್ ಲೈಟಿಂಗ್ ವ್ಯವಸ್ಥೆಗೂ ಇದೇ ವೇಳೆ ಚಾಲನೆ ನೀಡಲಾಯಿತು.
ರಾಜ್ಯ ಸರ್ಕಾರದ ಅಪಾರ ಮುಖ್ಯ ಕಾರ್ಯದರ್ಶಿ ಹಾಗೂ ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆಯ ನಿರ್ದೇಶಕ ಅನುಪಮ್ ಅಗರ್ವಾಲ್, ಕೆಒಎ ಅಧ್ಯಕ್ಷ ಕೆ.ಗೋವಿಂದರಾಜು ನೂತನ ವ್ಯವಸ್ಥೆಗೆ ಚಾಲನೆ ನೀಡಿದರು. ನೂತನ ಟರ್ಫ್ಗೆ ಚಾಲನೆ ನೀಡಿದ ಹಿನ್ನೆಲೆಯಲ್ಲಿ ರಾಷ್ಟ್ರೀಯ ತಂಡದ ಆಟಗಾರನ್ನೊಳಗೊಂಡ ಹಾಕಿ ಕರ್ನಾಟಕ ಅಧ್ಯಕ್ಷರ ಇಲೆವೆನ್ ಹಾಗೂ ಹಾಕಿ ಕರ್ನಾಟಕ ರಾಜ್ಯ ಇಲೆವೆನ್ ತಂಡಗಳ ನಡುವೆ ಪ್ರದರ್ಶನ ಹಾಕಿ ಪಂದ್ಯ ಏರ್ಪಡಿಸಲಾಗಿತ್ತು.
ಎಫ್ಐಎಚ್ ಮಟ್ಟದ ಟರ್ಫ್ ಹಾಕಲಾಗಿದ್ದು, 1800 ಲಕ್ಸ್ಗಳ ಸಾಮರ್ಥ್ಯವುಳ್ಳ ಫ್ಲಡ್-ಲೈಟ್ ಅಳವಡಿಸಲಾಗಿದೆ. ಮುಂದಿನ ದಿನಗಳಲ್ಲಿ ಅಂತಾರಾಷ್ಟ್ರೀಯ ಪಂದ್ಯಗಳನ್ನು ಆಯೋಜಿಸಲು ಯೋಗ್ಯ ಮೈದಾನ ಇದಾಗಿದೆ. ಕ್ರೀಡಾಂಗಣ ನವೀಕರಣ ಕಾಮಗಾರಿ ಹಂತ ಹಂತವಾಗಿ ಪೂರ್ಣಗೊಳಿಸಲಾಗುವುದೆಂದು ಅನುಪಮ್ ಅಗರ್ವಾಲ್ ತಿಳಿಸಿದರು.
ಅಧ್ಯಕ್ಷರ ಇಲೆವೆನ್ಗೆ ಜಯ
ಪ್ರಾಯೋಗಿಕವಾಗಿ ನಡೆದ ಪ್ರದರ್ಶನ ಪಂದ್ಯದಲ್ಲಿ ಕರ್ನಾಟಕ ಅಧ್ಯಕ್ಷರ ಇಲೆವೆನ್ ತಂಡ 1-0 ಗೋಲುಗಳಿಂದ ರಾಜ್ಯ ಇಲೆವೆನ್ ತಂಡವನ್ನು ಸೋಲಿಸಿತು. ಬಹುತೇಕ ರಾಷ್ಟ್ರೀಯ ಆಟಗಾರರಿಂದಲೇ ಕೂಡಿದ್ದ ಅಧ್ಯಕ್ಷರ ಇಲೆವೆನ್ ತಂಡದ ಪರ ಸಿಮ್ರಾನ್ಜಿತ್ ಸಿಂಗ್ ಏಕೈಕ ಗೋಲುಗಳಿಸಿದರು. ರಾಜ್ಯ ಇಲೆವೆನ್ ಪರ ವಿಆರ್ ರಘುನಾಥ್ ಕಣಕ್ಕಿಳಿದರೆ, ಅಧ್ಯಕ್ಷರ ಇಲೆವೆನ್ ಪರ ನಿಕ್ಕಿನ್ ತಿಮ್ಮಯ್ಯ, ಎಸ್ಕೆ ಉತ್ತಪ್ಪ, ವಿಕಾಸ್ ದಹಿಯಾ, ಗುರಿಂದರ್ ಸಿಂಗ್, ಹರ್ಜಿತ್ ಸಿಂಗ್, ರಮಣದೀಪ್ ಸಿಂಗ್, ಸತ್ಬೀರ್ ಸಿಂಗ್ ಗಮನಸೆಳೆದರು.
No comments:
Post a Comment